Roma Vat. Lat. 3075
Vaticana Civitas, Bibl. Apost., lat. 3075. Membranaceus, ca. annum 1333, fF. 76, mm. 294x216, binis columnis, 52 lineis per columnam, unica manu scriptus. Ligatura Vaticana, in charta spissa corio tecta.
Correctiones eadem manu et alia coaeva factae. Plures in margine notulae, aliis manibus scriptae, quarum tres in notulis nostris ponuntur, quia Gregorium Ariminensem memorant. Constat ex uno quinione, uno octonione, tribus senionibus et uno septenione, quorum quinque primi sunt signati.
Scriptura libraria Anglica. F. 1ra, littera initialis maior et ornata; alibi spatiola alba relicta.
Ff. lra-5ra, habetur sine titulo relatio Commissionis a Ioanne XXII in-stitutae2. F. 5rb-5v album.
Ff. 6ra-76ra, habentur sine titulo G. de Ockham Quodlibeta I-VII cum tabula quaestionum. F. 76rb-76v album. Quodlibetum quodque ad finem ultimae quaestionis et, primo excepto, etiam in summo folio ad initium quodlibeti insequentis scriptoris manu numeratur. Quaestiones in margine numerantur, quaestionibus Quodlibeti I exceptis, quarum nonnisi duae primae numerantur, et hoc intra columnam. Partes quaestionum in margine quandoque indicantur. Nomen Ockham nusquam invenitur. In exemplo mutationis subitae (Quodlibet VII, qq. 17 et 18), locus londonii designatur.
Quantum ad historiam codicis, notandum est quod codex quidam in Bibliotheca Vaticana sub numero 3075 olim adservabatur, qui opera varia Procli et Oeconomica Aristotelis continebat. Hic codex post annum 1613 a Bibliotheca amotus est, et hodie in Bibliotheca Communali Maceratae sub numero 5, 3 D 30 adservatur. In locum huius codicis perditi, altera pars codicis 3060 seiuncta est et sub numero 3075 supposita est.
Codex 3060 hodie 130 foliorum est, et eadem manu, qua codex noster 3075, scriptus est. Continet autem multorum Aristotelis operum abbreviations a Iacobo de Alexandria factas et Roberto Siciliae regi dicatas; Regulae theologiae; et Thomae Aquinatis De motu cordis. Ff. 4va, 16ra, 16va, in libri Physicorum abbreviatione, in margine, eadem manu: contra hocham.
